தூத்துக்குடி மாவட்டத்தின் ஒட்டப்பிடாரம் சட்டமன்றத் தொகுதியில் வரவிருக்கும் தேர்தலை முன்னிட்டு அரசியல் சூழல் பரபரப்பாக மாறியுள்ளது. தொழில் வளம் குறைந்து, மானாவாரி விவசாயம் சார்ந்த பகுதியாகக் காணப்படும் இந்தத் தொகுதி, சமூக மற்றும் அரசியல் ரீதியாக முக்கியத்துவம் வாய்ந்ததாகும்.
இந்தத் தொகுதியில் தேசிய ஜனநாயக கூட்டணி சார்பில் அமமுக வேட்பாளராக சுந்தர்ராஜ் களம் காண்கிறார். அவர், 2016ஆம் ஆண்டு சட்டமன்றத் தேர்தலில் அதிமுக சார்பில் வெற்றி பெற்று எம்எல்ஏவாக இருந்தவர் என்பதால், அவருக்கு தனிப்பட்ட வாக்கு வங்கி இருப்பதாக கருதப்படுகிறது.
மதச்சார்பற்ற முற்போக்கு கூட்டணி சார்பில் திமுக வேட்பாளராக ராமஜெயம் போட்டியிடுகிறார். ஆனால், தற்போதைய எம்எல்ஏ சண்முகையாவிற்கு இம்முறை கட்சி தலைமையால் சீட் வழங்கப்படாதது உள்ளூர் அரசியல் வட்டாரங்களில் அதிருப்தியை ஏற்படுத்தியுள்ளது. இதனால், அவரது ஆதரவாளர்கள் சில இடங்களில் எதிர்ப்பு தெரிவித்து போர்க்கொடி தூக்கினர். பின்னர் அவர் தமிழக வெற்றி கழகத்தில் இணைந்து போட்டியிட முயன்றாலும் அது சாத்தியமாகவில்லை என்று கூறப்படுகிறது.
இந்நிலையில், சண்முகையாவின் ஆதரவாளர்கள் திமுக வேட்பாளர் ராமஜெயத்திற்கு முழுமையாக பணியாற்றுவார்களா என்ற கேள்வி எழுந்துள்ளது. இது தேர்தல் முடிவில் முக்கிய தாக்கத்தை ஏற்படுத்தக்கூடும் என அரசியல் பார்வையாளர்கள் கருதுகின்றனர்.
மேலும், தமிழக வெற்றி கழகம் சார்பில் மதன்ராஜ் வேட்பாளராக அறிவிக்கப்பட்டு, அவர் வேட்பு மனு தாக்கல் செய்துள்ளார். இந்தக் கட்சி 2026ஆம் ஆண்டு முதல் முறையாக தேர்தல் களம் காண்கிறது என்பதால், அவர்களுக்கு கிடைக்கும் வாக்கு சதவீதம் குறித்து எதிர்பார்ப்பு நிலவுகிறது.
அதேபோல், நாம் தமிழர் கட்சி மற்றும் புதிய தமிழகம் கட்சி சார்பிலும் வேட்பாளர்கள் களமிறங்கியுள்ளனர். குறிப்பாக, புதிய தமிழகம் கட்சியின் டாக்டர் கிருஷ்ணசாமி இத்தொகுதியில் முன்னாள் எம்எல்ஏவாக இருந்த அனுபவம் கொண்டவர் என்பதும் குறிப்பிடத்தக்கது.
இதுபோன்ற பல்முனைப் போட்டி நிலவும் நிலையில், திமுக வேட்பாளருக்கு உள்ள ஆதரவு முழுமையாக இல்லாத பட்சத்தில், அமமுக வேட்பாளர் சுந்தர்ராஜ் முன்னிலை பெறக்கூடும் என்ற கருத்து அரசியல் வட்டாரங்களில் பேசப்படுகிறது. எனினும், இறுதி முடிவு வாக்காளர்களின் தீர்ப்பில் தான் இருக்கிறது என்பதும் குறிப்பிடத்தக்கது.
